Your Girlfriend and Me

💕निराजन सापकोटा 💕

                   " तिम्रो प्रेमिका र म "

पुरुषलाई केवल आवश्यकतापूर्तिको साधन ठान्ने
तिम्रो प्रेमिकालाई  घृणा गर्छु म !
र त्योभन्दा बढी घृणा त म तिमीलाई गर्छु
किनकि, त्यही प्रेमिकाको अँगालोभन्दा बाहिरको संसारै नदेखी
मेरो स्वतन्त्रताको खिल्ली उढाउँछौ तिमी ।
एकातिर मख्ख पर्छे ऊ
भर्खर भर्खर आएको तिम्रो तलबमा
र घृणा बर्साउन थाल्छे मेरो बेरोजगारी र रित्तो गोजीप्रति !
अर्कातिर घुटुक्क थुक निल्छे ऊ मेरै भित्री सौन्दर्यमा
अनि एकान्तमा घोत्लिन्छे, तिमीभित्र पनि
त्यही सौन्दर्यका झिल्का खोज्दै !
तर कहाँ पाओस् उसले मभित्रको अनुपम सौन्दर्य तिमीमा ?
किनकि, वर्षौंअघि उसले नै
पिरतीको पोखरीमा चोपलेर निभाइसकेकी थिई
तिमीभित्रको चेतनाको झिल्को !
घृणा गर्छु म तिम्रो त्यो बिचरी प्रेमिकालाई र
त्योभन्दा बढी घृणा त म तिमीलाई नै गर्छु !
किनकि, त्यही प्रेमिकासँग बिताउन चाहन्छौ तिमी
आफ्नो बाँकी जीवन !
#Modified "तिम्रो लोग्ने र म"